Nasuta nga usa sa labing naapektohan ang Sugbo sa pagsuspenso sa mga international flights, human giputol ang koneksyon niini sa labing menos tulo ka nasud sugod karong Abril.
Sa advisory, gipahibalo sa Philippine Airlines (PAL) nga ilang ihunong ang biyahe gikan Sugbo padulong Guam sugod Abril 16 hangtod sa walay tukmang petsa sa pagbalik, dul-an upat ka bulan pa lang sukad kini gilusad.
Ihunong usab sa PAL ang biyahe gikan sa Sugbu padulong sa Ho Chi Minh sugod Abril 19 hangtod sa walay takdang panahon, apan adunay pipila ka biyahe nga ipadayon sa Mayo 1, 3, 24 ug 31.
Dugang pa niini, tangtangon usab sa airline ang biyahe sa Sugbo padulong Ozamiz sugod Mayo 5 ug sa Calbayog sugod Mayo 6, nga suspendido usab hangtod sa walay tukmang petsa.
Samtang, ihunong usab ang biyahe gikan Clark padulong Siargao sugod Mayo 4. Una nang mipahibalo ang Cebu Pacific sa pagsuspenso sa biyahe gikan sa Cebu padulong Singapore sugod Abril 16 isip kabahin sa pagminus sa konsumo sa krudo.
Tungod niini, mabilin na lang ang unom ka international destinations sa Sugbo nga serbisyohan sa airline, ang Bangkok, Ho Chi Minh, Hong Kong, Incheon, Narita ug Osaka.
