Nahimong viral ang Bisaya short film nga “Gasolina: A Holy Week Special Feature” nga gihimo sa Cebuano content creator nga si Joseph “Ungart” Sabello, ug nakab-ot og kapin 39 milyon ka views sulod lang sa pipila ka adlaw sukad gipagawas niadtong Abril 4.
Sumala ni Sabello, ang tanang kita gikan sa maong pelikula ihatag ngadto sa mga tinuod nga breadwinners, ilabi na sa mga amahan nga nagmaneho aron mabuhi ang ilang pamilya.
Ang maong inisyatiba mitungha tali sa pagsaka sa presyo sa krudo, diin ang diesel mikabat na og ₱130 kada litro, nga nagpasamot sa kabug-at sa gasto sa mga delivery rider ug habal-habal driver.
Ang pelikula naghisgot sa kinabuhi sa usa ka single father nga naningkamot alang sa iyang tulo ka anak, samtang gitago ang iyang mga kalisdanan. Uban ni Sabello sa pelikula sila Boy Isog Sarge, Al Moralde, ug Shael.
Gilauman usab nga makigtambayayong ang grupo sa usa ka gasolinahan aron mas mapalapad ang tabang alang sa mga drayber nga naapektuhan sa taas nga presyo sa gasolina.
Photo Courtesy: Proud Bisaya Bai
