Mikunhod ang ihap sa mga krimen sa tibuok nasod atol sa Semana Santa 2026, sumala sa Philippine National Police.
Sa report sa PNP, giingon nga malinawon ang kadaghanan sa selebrasyon sa Holy Week ug walay dakong insidente nga naitala hangtod Abril 6.
Base sa ilang monitoring, mikunhod ang vehicular accidents gikan sa 9,388 sa miaging tuig ngadto sa 8,259 karong tuiga. Ang kaso sa pagkalumos miubos usab gikan sa 143 ngadto sa 84.
Apan, misaka ang insidente sa sunog gikan sa 82 sa 2025 ngadto sa 170 karong 2026.
Mikunhod usab og 23% ang “focus crimes,” gikan sa 1,574 ngadto sa 1,207 ka kaso. Lakip niini ang:
- murder (165 ngadto sa 160)
- homicide (65 ngadto sa 49)
- robbery (157 ngadto sa 153)
- theft (508 ngadto sa 443)
- rape (404 ngadto sa 139)
- carnapping sa sakyanan (13 ngadto sa 6) ug motorsiklo (10 ngadto sa 4)
Sa kinatibuk-an, mikunhod og 13% ang total nga krimen sa nasod gikan sa 11,187 ngadto sa 9,720.
Matod pa sa PNP, ang pagkunhod sa krimen resulta sa epektibong operasyon sa kapulisan ug sa kooperasyon sa lokal nga panggamhanan ug komunidad aron mapadayon ang kalinaw ug kahusay sa nasod.
