Gisuportahan ni Senador Sherwin Gatchalian ang ipatuman nga tulo ka termino o 3-term school calendar sa Department of Education sugod sa School Year 2026–2027, nga gitumong aron mapalig-on ang remediation programs alang sa mga estudyanteng naglisod sa pagbasa ug matematika.
Matod ni Gatchalian, dako kining kausaban kumpara sa miaging sistema diin walay klarong istruktura alang sa remediation, ug karon adunay gitakdang panahon alang sa academic intervention aron matabangan ang mga kabataan nga naay learning gaps.
Ubos sa bag-ong kalendaryo, bahinon ang school year sa tulo ka termino nga adunay specific nga mga blok para sa pagtudlo, intervention, ug ubang kalihokan sa eskwelahan. Human sa matag termino, magbutang usab og intervention period nga tutok sa remediation, training sa mga magtutudlo, ug wellness breaks.
Ang unang termino adunay opening block alang sa learner profiling ug preparasyon sa administrasyon, samtang magsugod na usab ang orientation sa mga magtutudlo ug stakeholders karong Abril.
Dugang pa sa senador, ang maong lakang nahiuyon sa Academic Recovery and Accessible Learning program nga gi-allocate-an og kapin Php8.9 bilyon sa 2026 national budget.
Gilauman nga pinaagi sa structured remediation, mas mapaayo ang learning outcomes, ilabina sa mga estudyante nga nagkinahanglan og dugang nga suporta sa ilang pundasyon sa edukasyon.
Photo Courtesy: PNA
