Gimando ni Interior Secretary Jonvic Remulla ang dinalian ug mas estrikto nga pagpatuman sa mga lokal nga ordinansa aron hingpit nga limpyohan ang mga komunidad gikan sa kasaba ug gubot. Gidili na sa Department of the Interior and Local Government (DILG) ang pagtagay o pag-inom og ilimnong makahubog sa mga sidewalk ug uban pang publikong lugar, lakip na ang pagpahimutang og mga lamesa sa kalsada nga makabalda sa agianan.
Gipahunong usab ang paggamit og videoke lapas sa alas 10 sa gabii, diin giawhag ang mga molupyo sa pagsumbong dayon sa 911 kon adunay magsaba-saba sa ilang dapit.
Gihingusgan usab sa maong kamandoan ang pagdisiplina pinaagi sa pagdakop sa mga maglakaw-lakaw nga walay sinina ug kadtong magsul-ob og bonnet sa publiko alang sa seguridad sa tanan.
Gitinguha ni Remulla nga mapugngan ang mga krimen ug sexual harassment nga sagad magsugod sa mga pundok-pundok ug hubog-hubog sa gawas sa balay.
Samtang gipasidan-an ang publiko nga mosunod, gihulga usab ang mga opisyal sa barangay nga pasakaan og kaso sa Ombudsman kon sila magpasagad sa ilang katungdanan sa pagpatuman niini nga mga lagda.
Photo Courtesy: Rappler
