Gipahigayon sa PNP Explosive Ordinance Disposal (EOD) ug K9 Unit ang usa ka controlled demolition aron i-deactivate ang duha ka tayaon nga MK2 hand fragmentation grenades niadtong Lunes, April 6, 2026, didto sa usa ka quarry site sa Barangay Tinagacan, General Santos City.
Nagsugod ang operasyon alas 6:27 sa buntag ubos sa pagdumala ni PLT Virgilio Relox Jr., diin gi-assess ang maong mga eksplosibo nga delikado na ug “unstable” tungod sa grabeng taya, hinungdan nga gipabuto kini dayon sa dapit diin kini nakit-an.
Nagtinabangay ang PNP Regional Mobile Force Unit 12, Bureau of Fire Protection (BFP) GenSan, ug ang mga sakop sa Barangay Peacekeeping Action Team (BPATs) aron masiguro nga sirado ang perimeter ug walay sibilyan nga mamiligro.
Nagmalampuson ang disposal sa alas 7:00 sa buntag, diin gisundan kini dayon og post-blast assessment aron ideklarar nga luwas ug limpyo na ang maong dapit. Nagpakita kini sa kaandam sa mga otoridad sa pag-neutralize sa bisan unsang hulga aron mapabilin ang kalinaw sa dakbayan sa GenSan.
Photo Courtesy: Robert Fores
