Gisaulog sa Santo Papa nga si Pope Leo XIV ang iyang unang Easter Sunday kagahapong adlawa, Abril 5, 2026, isip lider sa Simbahang Katolika, apan naputos kini sa kasubo tungod sa nagpadayon nga gubat sa Middle East.
Gipahigayon ang misa sa St Peter’s Square atubangan sa liboan ka mga magtutoo, diin nanawagan ang Santo Papa og kalinaw ug panaghiusa sa tibuok kalibutan. Iyang gisaway ang epekto sa gubat, way hustisya, ug pagkabahin-bahin sa mga nasod ug katawhan.
Samtang sa Jerusalem, gihimo ang mga seremonyas sa Church of the Holy Sepulchre apan sirado sa publiko tungod sa hulga sa seguridad.
Ang Israel nagpatuman og mas hugot nga pag kontrol sa mga panagtapok samtang nagpadayon ang tensyon batok sa Iran.
Sa lungsod sa Debel, bisan pa sa padayon nga pagbomba, nangandam gihapon ang mga residente sa pagsaulog sa Pasko sa Pagkabanhaw.
Apan sumala kang Joseph Attieh, makaguol ug makahahadlok ang kahimtang. Wala kuno mihunong ang pagpamusil sukad niaging adlaw ug wala sila katulog, apan nagpadayon gihapon ang ilang pagsalig sa Diyos isip ilang katapusang paglaum.
