Gisikop sa mga otoridad ang usa ka tag-iya og sari-sari store human kini naaktuhan nga namaligya og gituohang smuggled nga mga sigarilyo sa Barangay Conel, General Santos City, niadtong Abril 4, 2026.
Giila ang suspek sa alyas nga “Charl,” residente sa Purok 7 sa maong barangay. Sumala sa report, nahitabo ang pagpang-ronda bandang alas-11:30 sa buntag samtang nagpahigayon og intelligence monitoring ang mga operatiba batok sa mga wanted nga person ug uban pang ilegal nga kalihokan.
Naaktuhan sa tracker team ang suspek nga dayag nga nagbaligya sa mga kontrabando sa iyang tindahan. Napakyas ang suspek sa pagpakita og bisan unsang dokumento nga magpamatuod nga legal ang iyang gibaligya dihang gipangutana kini sa mga otoridad.
Nakuha gikan sa posisyon ni Alyas Charl ang mosunod nga mga ebidensya:
- Unom (6) ka pakete sa King Perfect
- Tulo (3) ka pakete sa Fort Menthol
- Tulo (3) ka pakete sa Canon Menthol
- Tulo (3) ka pakete sa Gajah Baru
Gipahibalo dayon ang suspek sa iyang mga katungod ubos sa balaod sa pinulongan nga iyang nasabtan sa wala pa kini gidala sa Dr. Jorge P. Royeca Hospital alang sa medical examination.
Sa pagkakaron naka kustudiya na ang maong suspek sa kapulisan samtang mag atubang sa kasong RA 10863 o An Act Modernizing The Customs And Tariff Administration ug RA 10643 Graphic Health Warnings Law.
Nagpadayon karon ang lawom nga imbestigasyon sa mga otoridad aron sutaon kon kinsa ang nag-supply niining mga smuggled nga sigarilyo sa maong dapit.
Photo Courtesy:estasyon nuebe Gscpo
