Gipahibalo ni Palace Press Officer USec. Claire Castro, nga gitutokan karon sa Pilipinas ang pinakaulahing politikanhong kalamboan sa Myanmar, ilabina ang pagkapili ni Min Aung Hlaing isip presidente.
Matod ni Castro, ang Pilipinas magpadayon sa pakig alayon sa mga hingtungdang awtoridad ug ubang stakeholders sa Myanmar pinaagi ni Ma. Theresa P. Lazaro, kinsa nagsilbi nga Special Envoy sa ASEAN Chair alang sa Myanmar, ingon man pinaagi sa mga embahada sa nasud.
Gipasiugda sa Pilipinas ang padayon nga pagsuporta niini sa hiniusang paningkamot sa ASEAN aron masulbad ang sitwasyon sa Myanmar. Gipasigarbo usab niini ang bag-ong lakang sa pagpatuman sa Five-Point Consensus.
Diin ang nag-unang tumong sa maong kasabutan naglakip sa dinalian nga paghunong sa kapintasan ug pagpadali sa paghatod sa humanitarian nga tabang ngadto sa katawhan sa Myanmar.
Gipasalig sa Pilipinas nga makigtambayayong kini sa rehiyonal nga mga inisyatiba aron sa pagpalambo sa kalinaw, kalig-on, ug kaayohan sa katawhan sa Myanmar.
Photo Courtesy: Manila Bulletin
