Gipasalig sa National Food Authority (NFA) sa Bukidnon nga adunay igong suplay sa bugas ang ilang mga bodega alang sa nagpadayon nga Php20 Rice Program (Php20 Rice Metro), human naobserbahan ang pagdugok sa mga tawo nga sayo pa kaayong naglinya sa ilang redemption site bulan sa Marso 2026.
Sumala ni Glenn Otoy, ang Public Information Officer sa NFA, sa exclusive nga pakighinabi ning sibyahan nga ang maong programa gidumala sa Department of Agriculture (DA) pinaagi sa Food Terminal Inc. (FTI), diin ang NFA maoy magsupply sa barato nga bugas.
Giklaro ni Otoy nga bisan pa man sa nasinating pagsaka sa presyo sa lana nga posibleng hinungdan sa kabalaka sa uban, dili angay mabalaka ang publiko sa suplay sa pagkaon busa aron masiguro ang kahapsay sa pagpang-apod-apod, nagpatuman ang NFA og priority numbering system sa ilang bodega sa Maramag. Sugod alas-5 sa buntag, manghatag na og numero alang sa 1,000 ka tawo.
Ang naghupot sa numero 1 hangtod 500 serbisyohan sa buntag, samtang ang numero 501 hangtod 1,000 sa hapon na.
Gipahinumdoman karon ang mga kwalipikadong mopalit nga magdala og valid ID ug kaugalingong sudlanan alang sa bugas aron mapaspas ang proseso.
Photo Courtesy: NFA Bukidnon
