Gipakusgan sa City Disaster Risk Reduction and Management Office (CDRRMO) sa Malaybalay ang kampanya aron mapalig-on ang pagpangandam sa matag purok ug barangay batok sa mga kalamidad, pinaagi sa sunod-sunod nga training ug evacuation drills diin gipasiugda ang duha ka major initiatives—ang Purok-Based DRRM Trainings ug ang Community-Based Massive Flood Evacuation Drill.
Kini ang gibutyag atol sa Kapihan Quarterly Media Forum, ni CDRRM Officer Alan J. Comiso, kung asa target sa ahensya nga maabot ang tanang 389 ka purok sa dakbayan pinaagi sa Capability Building Trainings nga nagtumong sa pagpalambo sa kahibalo sa komunidad, paglig-on sa koordinasyon sa lokal nga lebel, ug pagdasig sa aktibong partisipasyon sa mga molupyo.
Gipundohan sa kapin Php 3.2 milyon ang maong programa diin upat ka teams ang gipakatap aron magpahigayon og information drive sa matag barangay sulod sa duha ka bulan, lakip ang pagtudlo sa hustong buhaton sa wala pa, panahon, ug human sa emerhensya.
Gawas sa mga training, adunay simulation usab diin sulayan ang kahimtang sa pagresponde sa mga rescuers ug ang kooperasyon sa komunidad aron maminusan ang panic, masiguro ang luwas nga evacuation routes, ug maila ang kahuyang sa kasamtangang plano sama sa gihimong Massive Flood Evacuation Drill sa Sitio Panamukan, Barangay San Jose—usa sa mga lugar nga prone sa baha.
Naglaom ang lokal nga kagamhanan nga pinaagi niining mga lakang, mas mahimong lig-on ug andam ang matag pamilya batok sa bisan unsang katalagman
Photo Courtesy:CDRRMO Malaybalay City
