Niapil na sa giyera sa Middle East ang mga rebeldeng Houthi, gikan sa Yemen nga suportado sa Iran, human nila giangkon ang nahitabong missile attack sa Israel niadtong Dominggo. Tungod niini, misaka ang kabalaka nga mokaylap ang gubot gikan sa Persian Gulf hangtod sa Red Sea, nga anaa sa pikas bahin sa Saudi Arabia, ug posibleng makabalda sa tibuok shipping ug negosyo sa maong rehiyon.
Misamot ang kahadlok nga mokaylap pa ang maong kagubot dungan sa report gikan sa Washington Post nga nag-andam na ang Pentagon og mga plano alang sa operasyon sa mga sundalo sa US (ground operations) didto sa Iran—bisan pa og wala pa kini aprobahi ni Presidente Donald Trump. Ang pag-apil sa mga rebeldeng Houthi naghatag og dugang kalisod sa gubot nga dako na og epekto sa tibuok Middle East.
Ang maong giyera makaapekto sa suplay sa lana (oil) ug natural gas sa tibuok kalibutan, hinungdan sa kakuwangon sa abono (fertilizer), ug nakabalda usab sa mga biyahe sa eroplano. Ang hugot nga kontrol sa Iran sa Strait of Hormuz nakaapekto usab sa merkado ug sa presyo sa mga palaliton.
Apan ang pagsulod sa mga Houthi mahimong mas makadaot sa global shipping kon targeton nila ang mga barko sa Bab el-Mandeb (ang gitawag nga “Gate of Tears”) nga anaa sa baybayon sa Yemen sa Red Sea. Moagi dinhi ang gibana-bana nga 12% sa patigayon sa tibuok kalibutan.
Photo Courtesy: AP News
