Gikumpirma sa Petron Corp. ang pagpalit niini og gibana-banang 2.48 milyon ka bariles nga krudo gikan sa Russia isip dinalian nga lakang taliwala sa krisis sa Middle East.
Sumala sa gipagawas nga disclosure sa kompanya kagahapong adlawa Lunes, Marso 30, gihimo kining maong lakang human mabalda ang naandan nga suplay sa lana sa Pilipinas tungod sa tensyon sa gawas sa nasud.
Nabalda ang operasyon human mawad-an ang Petron og access sa upat ka milyon ka bariles nga krudo gikan sa Middle East sulod lamang sa walo ka adlaw.
Kini resulta sa gubat tali sa Amerika ug Israel batok sa Iran nga maoy hinungdan sa pagkaguba sa Strait of Hormuz, hinungdan nga napugos ang bugtong refiner sa nasud sa pagdangop sa Moscow isip “emergency measure” ug katapusang opsyon.
Gisiguro sa Petron nga kining suplay gikan sa Russia, uban sa uban pang nakuha nga stock, maoy magpasiga sa ilang refinery ug magpadayon sa operasyon hangtod sa bulan sa Hunyo.
Ang maong kompanya maoy naggunit sa 30% sa fuel market sa Pilipinas ug maoy nag-inusarang nag-operate og oil refinery sa tibuok nasud.
Nasulayan karon ang kalig-on sa suplay sa lana sa Pilipinas tungod kay 98% sa krudo sa nasud naggikan man sa Middle East.
Nagpahibalo na usab ang Petron nga posible pa silang mopalit og dugang suplay gikan sa Russia kung magpadayon ang krisis sa Middle East nga nagababag sa mga agianan sa barko sa lana.
Photo Courtesy: Petron
