Posibleng makansela ang mga prangkisa sa walo ka mga bus company nga nag-operate sa Bicol Region human nasuta nga ilegal ang ilang pagpasaka sa plitehan taliwala sa pagdagsa sa mga pasahero karong Semana Santa ug sa padayong pagsaka sa presyo sa produktong petrolyo.
Gikumpirma kini sa Land Transportation Franchising and Regulatory Board (LTFRB) atol sa press conference niadtong Lunes nga moluwat sila og show-cause orders batok sa mga kompaniya nga gireklamo.
Matod ni LTFRB Board Member Greg Pua, nadawat na nila ang maong report ug dili nila ibaliwala ang gihimo sa mga bus operators tungod kay hugot nga gibawal sa kagamhanan.
Una na niini gimonitor sa Parañaque Integrated Terminal Exchange (PITX) ang walo ka mga kompanya nga nipatuman og dili awtorisado nga pagsaka sa plitehan niadtong weekend.
Sa pagkakaron, padayong gi-verify sa LTFRB ang ubang report sa ilegal nga pagsaka sa plitehan ug hugot nga giawhag ang publiko nga direktang i-report sa ahensya ang susamang insidente.
Diin nipasidaan usab ang opisyal batok sa pag-abuso sa mga pasahero nga buot lang mobalik sa ilang tagsa-tagsa ka probinsiya aron sa pagsaulog sa Semana Santa. Kahibaloan nga giawhag sa (LTFRB) ang pipila ka mga transport groups sa pagsumite sa ilang mga petisyon alang sa usbaw sa plitehan.
Photo Courtesy:Inquirer.net
