Nagsugod na ang gitawag og Holy Week exodus diin padayon na ang pagdagsa sa mga biyahero padulong sa ilang tagsa-tagsa ka probinsya alang sa selebrasyon sa Semana Santa.
Bisan pa og Lunes Santo pa lamang, nabantayan na ang pagdagsa sa mga pasahero sa mga pantalan, airport, ug bus terminal sa tibuok nasud. Sumala sa Philippine Coast Guard, kapin sa 98,000 ka pasahero ang ilang natala sulod lamang sa alas 6 sa buntag hangtod alas 12 sa udto, diin 53,139 niini ang outbound samtang 45,129 ang inbound passengers.
Gipahibalo usab sa ahensya nga nakainspeksyon na sila sa 502 ka barko ug 786 ka motorbanca aron masiguro ang kaluwasan sa mga biyahero atol sa Semana Santa.
Sa Ninoy Aquino International Airport, padayon usab ang pagdagsa sa mga pasahero, samtang sa mga bus terminal sa Cubao, Quezon City, naglisod na ang uban sa pagkuha og tiket tungod sa kataas sa demand. Aduna nay mga ruta nga fully booked hangtod sa unang bahin sa Abril, lakip na ang mga biyahe paingon sa Bicol region.
Sa Parañaque Integrated Terminal Exchange, mikabat na sa 1.4 milyon ang total nga pasahero gikan Marso 22 hangtod 29, ug gilauman pa nga mosaka kini og labaw sa 3 milyon sa katapusan sa Semana Santa.
Gi-report sa Land Transportation Franchising and Regulatory Board ang walo ka bus operators tungod sa walay otorisadong pagsaka sa pasahe, ilabi na sa panahon nga misaka usab ang presyo sa petrolyo.
Sumala sa mga opisyal, bisan og nagdugang na og biyahe ang ubang operators, gilauman gihapon ang taas nga pila ug kakulang sa masakyanan sa mosunod pang mga adlaw.
Sa pagkakaron, nagpadayon ang panawagan sa mga otoridad sa publiko nga magplano daan sa ilang biyahe ug magbantay sa kaluwasan samtang nagpadulong sa ilang destinasyon niining Semana Santa.
