Nagpagawas og pasidaan ang World Health Organization (WHO) kabahin sa nagkagrabeng kahimtang sa panglawas sa mga tawo sa Middle East ug pipila ka bahin sa Europa tungod sa padayon nga tensyon ug panagbangi sa rehiyon.
Sumala sa WHO, lakip sa nag-unang hulga sa panglawas ang trauma, mga samad ug pagkabalda nga resulta sa kagubot, ingon man ang kakulang sa padayon nga access sa serbisyong medikal sa mga mibakwit nga residente.
Gipasidan-an usab ang posibilidad sa pagkaylap sa mga sakit sulod sa evacuation shelters.
Gitumbok usab sa WHO ang risgo nga dala sa mga pag-atake sa desalination plants nga maoy hinungdan sa pagminus sa suplay sa limpyo nga tubig.
Dugang pa niini, adunay posibilidad sa chemical, biological, radiological, o nuclear incidents nga mahimong adunay dakong epekto sa panglawas sa publiko.
Apil sa mga giila nga hulga ang heat-related illnesses, mental health distress, ug respiratory diseases nga mahimong mosamot tungod sa sitwasyon.
Samtang nagpadayon ang tensyon, naghatag usab og kabalaka ang mga pag-atake sa oil storage facilities ug refineries sa Iran, Bahrain, ug Saudi Arabia, nga posibleng makapagrabe sa polusyon sa hangin ug mosangpot sa kakulang sa suplay sa enerhiya.
Gipadayag pa sa WHO nga ang mga pag-atake sa health facilities nagresulta na sa pagkamatay sa pipila ka health workers, nga nagpasamot sa kakulang sa serbisyong medikal sa mga apektadong lugar.
Dugang pa, ang pagkabalda sa supply chains, pagsaka sa gasto sa transportasyon, ug pabag-o-bag-ong presyo sa enerhiya nakaapekto sa pag-access sa mga importante nga tambal ug medikal nga suplay.
Busa, gi-awhag sa WHO ang international community nga magtinabangay aron malikayan ang mas dako pang krisis sa panglawas sa mga apektadong rehiyon.
Photo Courtesy: SEforALL
