Nakatakdang mousbaw ang presyo sa pipila ka mga produkto sa supermarkets sugod Abril 1, sumala sa grupo sa mga supermarket sa nasud.
Gipasabot sa Philippine Amalgamated Supermarkets Association Inc. nga ang pagtaas sa presyo may kalabutan sa pagsaka sa presyo sa lana tungod sa padayon nga tensyon sa Middle East.
Matod ni Steven Cua, presidente sa maong asosasyon, pipila na ka mga manufacturer ang mipahibalo sa ilang plano nga magtaas og presyo sa ilang mga produkto.
Usa sa mga manufacturer ang mitaho nga tanan nilang produkto kinahanglan na usab usbawan ang presyo, apil na ang mga kemikal, nga posibleng naapektuhan sa kakulang sa raw materials.
Lakip sa mga produktong maapektuhan mao ang pasta, noodles, canned goods, candies ug bottled water.
Posible nga moabot hangtod 10 porsyento ang umento sa presyo sa pipila niini. Gipasidaan usab nga dili lang usa ka higayon ipatuman ang price increase, kondili posible nga hinay-hinay nga ipatuman ang pagsaka sa presyo base sa kahimtang sa merkado ug sa demand.
Photo Courtesy: Simple Recipes
