Patay ang usa ka lalaki human gipusil sa wala mailhing suspetsado pasado alas 4:30 sa kadlawon, Marso 29, 2026 sa Purok 2, Barangay Bangahan, Pangantucan, Bukidnon.
Nailhan ang biktima si alyas Allan, 60-anyos, tag-iya sa Mobile Sound System ug residente sa Balangay 3, lungsod sa Quezon Base sa report, nga ang biktima gi-hire sa Barangay Bangahan Council alang sa local disco.
Samtang nag-impake ang mga crew, nilakaw ang biktima paingon sa iyang Bongo truck. Pipila ka minutos ang milabay dihang nakadungog ang mga crew og tulo ka buto sa armas ug nabantayan nila ang usa ka motorsiklo nga nikalagiw sa kasadpan nga direksyon.
Pagkahuman, nakit-an na lamang nila ang biktima nga nagbuy-od na sa yuta nga dunay daghang samad pinusilan sa nagkadaiyang parte sa iyang lawas. Nakuha sa crime scene ang duha ka basiyo sa bala sa kalibre .45 nga pistola.
Sa karon nagpahigayon ang Pangantucan PNP sa makuting imbestigasyon arun matino ang motibo sa pagpamusil ug pag-ila sa suspetsado.
Photo Courtesy:Pangantucan Municipal Police Station
