Andam na matod pa ang Philippine National Police (PNP) sa rehiyon sa Caraga alang sa implementasyon sa Oplan Ligtas Sumvac 2026, nga nagtinguha sa pagseguro sa kaluwasan sa publiko atol sa summer vacation ug Holy Week.
Sumala kang Jennifer Ometer, tigpamaba sa Police Regional Office 13 (PRO-13), gisugdan na ang heightened alert alert status sugod kagahapong adlawa Marso 29 isip pagpangandam sa umaabot nga pagdagsa sa byahe sa mga turista ug bakasyunista sa tibuok rehiyon.
Ang Oplan Sumvac 2026 ipatuman hangtod Mayo 31, 2026, diin pakusgan ang police visibility ug foot patrol, ilabina sa mga tourist destinations, transport terminals, ug mga simbahan nga ginadagsa sa katawhan.
Gibutyag usab nga mokabat sa 1,460 ka mga pulis ang ipakatag sa nagkalain-laing lugar sa Caraga, samtang andam usab ang Regional Mobile Force Battalion 13 sa paghatag og dugang pwersa kon gikinahanglan.
Sa sunod semana, lauman na nga makita ang dugang presensya sa kapulisan sa mga estratehikong lugar, diin prayoridad ang kaluwasan sa publiko ug ang hapsay nga pagbiyahe sa mga bakasyunista. Andam usab matud pa ang mga otoridad sa dali nga pagresponde sa bisan unsang emerhensiya.
Lakip sa ipatuman nga lakang ang inspeksyon sa mga bus terminal ug ang pagbutang og Motorist Assistance Centers sa mga nag-unang kadalanan. Magtukod usab og Police Assistance Desks sa mga simbahan, airport, pantalan, bus terminal, ug uban pang importanteng lugar.
Matod pa ni Ometer, direktiba kini ni Regional Director Marcial Mariano Magistrado IV, sa PRO-13, aron masiguro dili lamang ang kaluwasan sa publiko kondili usab ang kalinaw ug kahapsay sa pagbiyahe sa tanang magbakasyon.
Gilauman sa PNP nga pinaagi sa maong operasyon, mabati sa publiko ang kasiguruhan ug kahapsay bisan asa sila moadto sulod sa maong panahon sa Caraga Region.
