Nanawagan si Senador Sherwin Gatchalian sa mas agresibong aksyon sa gobyerno aron matubag ang nagkagrabeng krisis sa enerhiya tungod sa pagsaka sa presyo sa lana sa kalibotanong merkado.
Partikular nga giawhag sa senador ang executive branch nga makiglambigit sa Iran aron masiguro ang luwas nga pag-agi sa mga barko sa lana sa Pilipinas agi sa Strait of Hormuz, usa ka kritikal nga ruta sa suplay sa lana.
Miingon si Gatchalian nga ang dinaliang high-level nga diplomatikong aksyon mahinungdanon aron malikayan ang mga pagkabalda sa suplay nga makapabug-at lang sa mga konsumidor.
Sa samang higayon, niingon usab ang senador nga ang Camago-3 gas field naghatag ug paglaom taliwala sa pagsaka sa gasto sa enerhiya, bisan pa nga matod niya nga magkinahanglan kini og panahon aron kini mabati sa presyo sa kuryente.
Gihatagan ug gibug-aton ni Gatchalian ang kamahinungdanon sa padayon nga eksplorasyon ug pagpamuhunan sa lokal nga enerhiya aron masiguro ang igong suplay ug mas barato nga presyo sa umaabot.
Samtang, nunot sa nagsingabot nga pagsaka sa presyo sa LPG, giawhag usab ni Gatchalian ang Department of Energy ug Department of Trade and Industry nga tun-an ang pagpatuman sa price cap.
Photo Courtesy: Senator Sherwin Gatchalian
