Milagro nga naluwas ang usa ka lalaki sa amihanang-sidlakan sa China human nadiskubrehan sa mga doktor ang usa ka 12 sentimetro nga metal nga chopstick nga natanggong sa iyang totonlan sulod sa walo ka tuig.
Sumala sa report, aksidente nga natulon sa biktima ang maong butang apan wala niya kini gihatagan og pagtagad kaniadto. Bisan pa sa kasakit nga iyang gibati sa sinugdanan, gipasanginlan lamang niya ang iyang pag-inom og ilimnong makahubog nga maoy hinungdan sa iyang dili maayong pamati.
Tungod kay misamot na ang iyang giantos nga simtomas, napugos ang lalaki sa pagpakonsulta sa usa ka tambalanan sa Dalian. Pinaagi sa usa ka minimally invasive procedure, malampusong nakuha sa mga eksperto ang chopstick nga walay gihimo nga bisan unsang hiwa sa gawas nga bahin sa lawas sa pasyente.
Hingpit na nga naka-recover ang maong lalaki ug wala’y natala nga bisan unsang seryosong komplikasyon. Ang maong hitabo nagsilbing makapakurat nga pahinumdom sa publiko nga dili gayud angayng balewalaon ang bisan unsang katingad-an nga bation sa lawas, tungod kay posible kining timailhan sa usa ka peligrosong kahimtang.
