Nadakpan ang duha ka lalaki nga suspek sa ilegal nga droga atol sa buy-bust operation nga gihimo sa kapulisan sa Purok 2, Brgy. Matti, niadtong nakalabay nga adlaw.
Ang operasyon gipahigayon sa joint operatives sa City Drug Enforcement Unit (CDEU) ug Intelligence Unit sa Digos City Police Station, uban ang koordinasyon sa PDEA 11 ug ubang intelligence units.
Ang mga nadakpan giila sa alyas nga “Tol,” 38-anyos, usa ka welder ug residente sa Brgy. Kiagot, nga giila isip High-Value Individual (HVI), ug “Demit,” 34-anyos, walay trabaho ug residente sa Brgy. Matti, nga giila usab isip Street-Level Individual (SLI).
Narekober gikan sa mga suspek ang usa ka sachet sa ginatuhuang shabu nga gigamit isip buy-bust item, walo ka dugang ka sachet sa maong ilegal nga droga, usa ka markadong Php1,000 bill, duha ka VIVO Android nga cellphone, coin purses, lighter, ug Php100 nga kwarta.
Sumala sa kapulisan, ang tanang narekober nga shabu adunay gibana-banang gibug-aton nga 24.99 gramos og adunay standard drug price nga moabot sa Php169,932.
Gidala ang mga suspek ug ebidensya sa Digos City Police Station alang sa hustong dokumentasyon. Gipaubos usab sila sa medical examination sa Davao del Sur Provincial Hospital ug drug testing sa Provincial Forensic Unit. Samtang giandam na ang kasong paglapas sa Republic Act 9165 batok sa mga supetsado.
