Makatabang sa atong kasing-kasing ang duha ka minuto nga pagkatawa nga halos pareha ang benepisyo sa 20-minutos nga paglakaw, matod pa sa pagtuon sa University of Maryland Medical Center.
Segon sa panukiduki, nga kon mokatawa ang usa ka tawo, molapad ang mga ugat sa dugo nga maoy hinungdan sa mas maayong pagdagan sa dugo sa tibuok lawas. Gumikan niini, mas daghang oxygen ang madala ngadto sa mga tisyu sa lawas, nga pareho sa epekto sa gaan nga ehersisyo sama sa brisk walking.
Nakita usab sa mga pagtuon nga ang katawa makatabang sa pagpaubos sa stress hormones nga mahimong makapabug-at sa trabaho sa kasing-kasing kon magpadayon sa dugay nga panahon.
Segon pa usab sa mga eksperto, ang kanunay nga pagkatawa usa ka sayon ug natural nga paagi aron mapalig-on ang cardiovascular health, makapamenos sa stress, ug makahatag og maayong pamati sa panglawas ug hunahuna.
Gidasig sa mga espesyalista ang publiko nga magpadayon sa aktibong lifestyle ug likayan ang sobrang stress, diin apil ang pag-exercise, hustong pahulay, ug bisan ang simple nga katawa isip kabahin sa pag-amping sa kasing-kasing.
Photo Courtesy: Vecteezy
