Gilusad sa Provincial Government sa Sarangani, pinaagi sa Project Implementing and Management Unit (PIMU), ang usa ka masusing documentation activity uban sa People’s Survival Fund (PSF) niadtong nakalabay nga adlaw.
Gipakita sa maong kalihokan ang dakong progreso ug epekto sa Saub Watershed Ecosystem Rehabilitation and Flood Risk Reduction Project nga nahimutang sa lungsod sa Maitum.
Gipasiugda ni Board Member Elmer T. De Peralta, ang chairperson sa SP Committee on Environment ug representante ni Governor Rogelio “Ruel” D. Pacquiao, ang lig-ong suporta sa kagamhanang lokal sa mga programa nga mopalig-on sa komunidad batok sa mga risgo sa climate change.
Gipaambit usab ni Maitum Mayor James Mark B. Reganit nga ang lig-ong kooperasyon tali sa probinsya, munisipyo, ug katawhan mao ang yawe sa pagkab-ot sa mga tumong sa maong proyekto.
Gipunting nila ni PIMU Project Manager Cornelio M. Ramirez, Jr. ug MENRO Nanette R. Nacional ang kamahinungdanon sa agroforestry development ug community capacity-building isip dalan sa malungtarong pagpanalipod sa kapin pito ka libo (7,000) ka hektarya nga watershed.
Gipamatud-an sa mga benepisyaryo sa agroforestry nga ang maong proyekto dili lang nagpanalipod sa kinaiyahan, kondili nagpauswag usab sa ilang inadlaw-adlaw nga panginabuhian.
Gitinguha karon sa Sarangani ug sa PSF nga ang maong kalamposan makadasig sa uban pang mga LGUs sa tibuok nasud nga mopahimulos sa maong pundo alang sa kaayohan sa kalikupan ug sa katawhan.
Photo Courtesy: Sarangani Provincial Information office
