Gibalibaran sa Bureau of the Treasury (BTr) ang bilyon-bilyong kantidad sa tanyag nga utang (T-bonds) sa gipahigayon nga auction niadtong Marso 24.
Kini human nangayo ang mga investors og taas kaayong interes o yields tungod sa epekto sa gubat sa Middle East ug sa pagsaka sa presyo sa lana. Sa target nga ₱40 bilyon nga unta utangon sa nasudnong kagamhanan, ₱5.6 bilyon lamang ang gidawat sa BTr aron malikayan ang pagbayad og dako kaayong interes sa umaabot nga katuigan.
Matod sa mga ekonomista gikan sa RCBC ug SM Investments Corp., ang pagsaka sa yields nagpakita sa kahadlok sa merkado tungod sa inflation ug ang nagkahuyang nga kantidad sa Philippine Peso. Sa kasamtangan, ang Pilipinas ang nitala nga adunay pinakataas nga interes sa bond yields sa tibuok rehiyon sa Asia (7.06% alang sa 10-year bond), mas taas pa kaysa sa Indonesia, Vietnam, ug Malaysia.
Gipasabot ni Jonathan Ravelas sa Reyes Tacandong & Co. nga mas maayo kini nga lakang sa gobyerno aron dili ma-lock ang nasod sa “mahal nga utang” samtang gihulat pa nga mo-stabilize ang ekonomiya sa kalibutan. Gilauman nga magpadayon ang mabinantayong baruganan sa BTr sa mga mosunod nga semana samtang taas pa ang volatility sa merkado.
Photo Courtesy: MNC
