Miani og nagkalain-laing reaksyon sa social media ang usa ka delivery rider human siya mikarga og kapin 70 ka karton nga parcel sa iyang single motor.
Ang rider nailhan nga si Roniel, taga Laguna. Sumala sa iyang pahayag, dili kini ang unang higayon nga iyang gihimo ang pagkarga og daghang parcel sa iyang motor. Ilabi na kay layo ang iyang biyahe, napugos siya sa pagdala og daghan aron dili siya malugi.
Gipasabot usab niya nga karong panahona, misaka pag-ayo ang presyo sa gasolina—labaw na sa katunga kumpara sa miaging mga bulan. Tungod niini, kinahanglan gyud siyang mokarga og daghan aron mabawi ang gasto sa biyahe.
Aron masigo ang daghang parcel, gibutangan niya og carrier ang iyang motor aron maplastar og tarong ang mga karton ug mas sayon kini matali ug madala padulong sa bukid.
Giangkon sa rider nga lisod kaayo ang pagmaniho tungod sa kabug-at ug kataas sa iyang karga, apan wala siyay laing kapilian kundi buhaton kini aron makapanginabuhi ug dili malugi sa gasolina.
Bisan pa niini, hugot nga gidili sa Land Transportation Office (LTO) ang overloading. Sumala sa Republic Act No. 8794 o Anti-Overloading Act, mahimong mag-atubang og kaso ang mga driver nga molapas sa gitugot nga karga.
