Gipaabot ni Konsehal Paolo Nicolo Gaane, ang chair sa City Council committee on health, niadtong Lunes nga positibo ang pagpahigayon sa school-based Information and Education Campaign (IEC) mahitungod sa rabies awareness.
Matod pa ni Gaane atol sa regular session, ang rabies nagpabiling usa ka tinuod nga hulga nga naghatag og peligro sa matag bata nga nagdula sa kadalanan ug sa matag pamilya nga wala pa maabti sa proteksyon ug husto nga kasayuran. Sumala sa konsehal, ang City Veterinary Office nagpahigayon og mga informative session sa 15 ka mga publikong tunghaan lakip na ang City Central School, Migtugsok Elementary School, ug Besigan Elementary School, diin kapin sa 5,300 ka mga estudyante, magtutudlo, ug mga personahe ang naabot sa programa.
Dugang pa niini, ang City Veterinary Office naglunsad og “high-density rabies vaccination program” sa napulo ka mga barangay: Balulang, Carmen, Gusa, Camaman-an, Canitoan, Pagatpat, Iponan, Tablon, Lumbia, ug Agusan, sulod sa 43 ka adlaw nga pagpamakuna. Gipahayag ni Gaane nga sa target nga hapit 30,000 ka mga iro sa kapin 62,000 ka panimalay, kini nga paningkamot usa ka seryoso nga interbensyon sa panglawas sa tibuok syudad.
Photo courtesy: City Veterinary Office- Cagayan de Oro
