Giaprobahan na ni Ferdinand Marcos Jr. ang pagpatuman sa three-term school calendar para sa mga public schools sugod sa School Year 2026–2027. Ang direktiba migula human sa rekomendasyon sa Economic and Development Council atol sa ilang panagtagbo sa Malacañang niadtong Marso 19.
Gipasiugda sa Presidente ang panginahanglan nga paspasan ang mga reporma sa edukasyon aron masiguro ang padayon ug dili maputol nga pagkat-on sa mga estudyante, uban sa mga prayoridad nga programa sa gobyerno.
Tungod niini, gimanduan niya ang Department of Education (DepEd) nga mangandam alang sa hingpit nga pagpatuman sa bag-ong kalendaryo.
Ubos sa bag-ong setup, ang naandan nga upat ka quarters sa school year pagahimoon nang tulo ka termino aron malikayan ang huot nga iskedyul ug mahimong mas organisado ang pagdagan sa mga leksyon.
Tungod sa three-term calendar, mabahin ang school year ngadto sa klaro nga instructional ug assessment periods.
Gilauman usab nga pinaagi niini nga reporma, maminusan ang pagkaputol-putol sa leksyon, adunay hapsay nga panahon para sa pag-recover sa mga estudyante, ug mapalambo ang kinatibuk-ang kalidad sa paghatod sa pagkat-on.
Photo Courtesy: Philstar.com
