Patay ang isa ka indibidwal og tulo ang nasamdan sa nahitabong disgrasya sa kadalanan sa may Purok Dancing Lady, Barangay San Pablo, Dumingag, Zamboanga del Sur, Marso 22, 2026.
Base sa imbestigasyon sa Dumingag Municipal Police Station, kalit nadasmagan ang mitabok nga usa ka 58-anyos nga biktima sa pedestrian lane. Samtang gimaneho sa 18-anyos nga babaye ang Honda XRM 125 sakay ang duha ka angkas nga nagpaingon sa New Basak, Dumingag, Zamboanga del Sur.
Tungod sa kakusog sa impact, natumba ang motorsiklo og ang drayber apil ang mga angkas niini, samtang ang gidasmagan nabunal sa sementadong dalan og dali usab nga gidala sa mga mirespondeng personahe sa Dumingag MPS ug MDRRM Office, ngadto sa Dumingag Rural Health Unit alang sa medikal nga atensyon.
Apan gideklara nga dead on arrival sa attending physician ang gidasmagan nga biktima, samtang ang drayber ug iyang mga angkas nakaangkon og gagmayng samad ug bun-og sa kalawasan.
Sa karon ang drayber ingon man ang motorsiklo nga nakabangga gidala na sa Dumingag Municipal Police Station alang sa tukmang lakang.
Nagpahimangno ang kapulisan sa tanang motorista ug publiko nga mag-amping ug mosunod sa balaod sa trapiko aron malikayan ang susamang aksidente.
Photo Courtesy:PD ZSPPO, PRO 9
