Patay ang usa ka 36-anyos nga barangay chairwoman human kini gipusil sa wala mailang suspetsado sa Purok 1, Barangay Licuroan, Midsalip, Zamboanga del Sur, buntag sa Marso 22, 2026.
Sa imbestigasyon nasayran, kauban sa biktima ang 20 -anyos nga lalaki gikan sa Barangay Poblacion pauli sa Barangay Licuroan sakay sa usa ka single motor apan gumikan sa kadaot sa dalan nakadesider ang biktima sa pagbaklay.
Pipila ka minuto ang milabay, buto sa pusil ang nadungog gikan sa kalasangang bahin nga miigo sa nagkadaiyang parte sa lawas sa biktimang kapitana.
Dali nga gidala ang biktima sa Midsalip Infirmary Hospital alang unta sa dinaliang pagtambal apan gideklara na kining dead on arrival sa miatiman nga doctor.
Na-recover usab sa mga otoridad sa mismong lugar nahitabuan ang upat ka mga empty shell casings ug deformed slug sa 45 caliber firearm nga gituohang gigamit sa pagpamusil.
Naglunsad usab dayon ug hot pursuit operation ug nag-establisar ug checkpoints ang Midsalip MPS sa pakigkoordinar sa haduol nga mga Municipal Police Station aron maila ug madakpan ang mamumuno.
Samtang, gituohang personal nga motibo ang hinungdan sa pagpamusil sa maong biktima.
Photo Courtesy: PD ZSPPO, PRO 9
