Wla katuo ang usa fur owner sa nasud Florida ang usa ka unom ka tuig nga iring nga ginganlan og Midnite hapit na unta i-euthanize human siya gisurender sa iyang amo tungod sa delikadong intestinal blockage.
Sumala sa taho, grabe na ang kahimtang sa iring ug gituohang lisod na kaayo kini matambalan. Ang operasyon mahal ug komplikado, maong kadaghanang shelter posibleng mopili na lang sa euthanasia o kon sa tawo pa “mercy killing”.
Apan, ang HALO No-Kill Rescue Shelter nga agency sa mga kahayupan, midesisyon nga hatagan pa og usa ka higayon si Midnite. Ilang gikuha ang kustodiya sa iring og gioperahan.
Sa dihang giablihan sa mga beterinaryo ang tiyan ni Midnite, nakurat sila sa ilang nadiskubrehan. Nakakita sila og 26 ka hair ties nga nagkabuhol-buhol sulod sa iyang tiyan ug tinai, nga hinungdan sa seryosong blockage nga posibleng ikamatay niya. Matag usa niini ilang nakuha sa operasyon.
Human sa operasyon, malampuson nga naka-recover si Midnite. Sumala sa shelter, nibalik na ang iyang kusog ug gana sa pagkaon, ug gilauman nga makab-ot niya ang hingpit nga pagkaayo.
Gipahimangno usab sa shelter ang publiko bahin sa peligro sa gagmay nga mga butang sama sa hair ties, rubber bands, ug pisi. Matod pa nila, kasagaran kini ginaduwaan sa mga hayop ug aksidenteng matulon, nga mahimong hinungdan sa delikadong komplikasyon sa ilang lawas.
Gidasig ang mga tag-iya sa mga alagang hayop nga bantayan ang ilang palibot ug sigurohon nga ang mga gagmay nga butang dili makuha sa ilang mga binuhi, aron malikayan ang susamang insidente.
Si Midnite, nga hapit mamatay, karon adunay bag-ong higayon tungod sa tabang sa shelter nga mituo nga ang iyang kinabuhi angay maluwas.
Photo Courtesy : AOL.COM
