Duha ka gituohang miyembro sa Communist Terrorist Group (CTG) ang napatay samtang upat ka high-powered firearms ang narekober sa gilunsad nga operasyon sa militar didto sa kabukiran sa Barangay Nurcia, Lanuza, udto sa Marso 22, 2026.
Ang operasyon gipahigayon sa tropa sa 36th Infantry “Valor” Battalion ubos sa pagpangulo ni LTC Joselito B. Ante Jr., nga anaa sa ilawom sa operational control sa 401st Infantry “Unite N’ Fight” Brigade nga gipangulohan ni COL Glenn Joy U. Aynera.
Sa inisyal nga report, ang duha ka napamatay nga rebelde giila sa ilang mga alyas nga “Ka Rex” ug “Ka Bunso,” nga gituohang sakop sa SRSDG Westland sa Northeastern Mindanao Regional Committee (NEMRC).
Gikataho nga miulbo ang engkwentro human nakadawat og impormasyon ang militar gikan sa mga residente sa duol nga komunidad nga matod pa gipanghulga ug gipangayuan og kwarta sa maong grupo. Tungod niini, napugos sa pag-atras ang ubang mga rebelde ug gibiyaan ang duha ka kasamok sa lugar.
Gawas sa duha ka namatay, narekober usab sa mga tropa ang upat ka high powered firearms, nga giila nga dakong kapildihan sa kapasidad sa armadong grupo sa pagpadayon sa ilang kalihokan sa maong lugar.
Human sa pagbinayloay og mga bala, dayon nga gisiguro sa militar ang lugar pinaagi sa clearing operations aron mapanalipdan ang mga sibilyan ug malikayan ang posibleng hulga sa komunidad.
Matod pa ni COL Aynera, ang kalampusan sa operasyon dili lamang bunga sa kusog sa militar kundili usab sa kooperasyon sa mga lokal nga residente nga nagtabang sa paghatag og impormasyon.
Photo courtesy: 401st Infantry “Unite N Fight” Brigade
