Gilauman nga mosaka ang presyo sa kuryente karong Abril tungod sa kasamtangang gubat sa Middle East ug sa pag us-os sa peso kontra dolyar, sumala sa Energy Regulatory Commission (ERC).
Gipahibalo ni ERC Chairperson Francis Saturnino Juan nga kung ang epekto sa presyo gikan sa supply sa mga generation companies ngadto sa mga distribution utilities ug retailers, makita na kini sa billing karong Abril. Wala pa klaro ang eksaktong kantidad sa posibleng pagtaas.
Sumala sa National Association of Electricity Consumers for Reforms (NASECORE), kung base sa additional cost, posible mosaka ang rate sa Php2 hangtod Php4, nga moresulta og Php400 dugang bayad sa mga panimalay nga nagkonsumo og 200 kilowatt hours. Gisugyot nga ang pagtaas i-audit ug ipatuman sa staggered basis.
Nagpasabot usab ang ERC nga mag-isyu sila og direktiba sa mga electric utilities ug generation suppliers aron ipatuman ang pagtaas sa staggered basis. Gidugang pa ni Juan nga ang taas nga demand sa kuryente usa sa rason sa posibleng pagtaas.
Ang mga planta nga naggamit og coal adunay igo nga supply, samtang ang 10% nga nagdepende sa fuel gi-standby para sa emergency. Ang gobyerno padayon nga nag-andam aron masiguro ang supply bisan pa sa posibleng pagtaas sa presyo.
Photo Courtesy: Istock
