Gikatakdang maghugot sa ilang bakus ang mga motorista sa karon nga semana tungod sa laing hugna sa pagsaka sa presyo sa gasolina, dungan sa nagpadayong krisis sa petrolyo tungod sa gubat sa Middle East.
Sumala sa usa ka tinubdan gikan sa industriya sa lana, mao kini ang gipaabot nga usbaw sa presyo sa karon nga semana:
- Diesel: Php14.00 ngadto sa Php14.50 kada litro
- Gasolina: Php7.00 ngadto sa Php7.50 kada litro
Tungod niini, mahimong moabot ang presyo sa diesel sa Php130 kada litro, samtang ang gasolina molapas na sa Php100 kada litro human sa double-digit nga pagsaka niining semanaha.
Ang pagsaka sa presyo giduso tungod sa kakuwang sa suplay tungod sa pagkaguba sa mga imprastraktura sa enerhiya sa Middle East taliwala sa nagkagrabe nga gubat sa US-Israel batok sa Iran.
Una nang gipahibalo sa Department of Energy (DOE) ang mga kausaban sa presyo alang sa semana sa Marso 17 hangtod Marso 23:
- Diesel: Php20.40 ngadto sa Php23.90 kada litro
- Gasolina: Php12.90 ngadto sa Php16.60 kada litro
Bisan pa sa pagsaka sa presyo, gipaniguro sa DOE nga adunay igong suplay sa lana ang nasod apan nagpasidaan batok sa pag-imbak o hoarding.
“Ang dili matagna mao ang hoarding. Kon naay usa nga mag-hoard, maapektuhan ang tanan, ilabi na ang mga PUV. Kinahanglan natong pugngan ang hoarding ug dili maghatag og dugang kalisang sa katawhan,” matod ni Energy Secretary Sharon Garin.
Photo Courtesy: logisticsbid
