Gikumpirma sa aktor nga si Jeric Gonzales ang opisyal nga panagbulag nila sa kanhi Miss Universe Philippines 2020 nga si Rabiya Mateo.
Sa usa ka interbyu bag-ohay pa lamang, giangkon ni Jeric nga bisan pa man sa ilang paningkamot nga isalbar ang relasyon, nakahukom silang duha nga buhian ang usag-usa alang sa ilang personal nga paglambo.
Gipasabot ni Jeric nga “mutual decision” ang ilang breakup ug nagpabilin silang managhigala. Nagpasalamat usab siya kang Rabiya sa gugma ug pagsabot niini sa iyang sitwasyon isip artista, samtang nangayo og pasaylo nga dili na niya makuyogan ang dalaga sa mga sunod niining biyahe sa kinabuhi.
Dungan niini, gibutyag usab ni Rabiya Mateo ang iyang plano nga mobalik sa pagtungha aron matuman ang iyang damgo nga mahimong usa ka doktor.
Sa usa ka vlog, gipaambit ni Rabiya nga usa kini ka “calling” alang kaniya. Gawas sa iyang tinguha nga makatabang sa uban, dako usab og kalabutan ang iyang tinguha nga mas masabtan pa ang iyang kaugalingong mental health.
“Gusto nako gamiton ang akong kahibalo aron makatabang sa mga tawo,” matod pa ni Rabiya.
Kahinumduman nga nagsugod ang relasyon sa duha niadtong tuig 2022, apan karon, gipili sa matag usa ang pagsubay sa managlahing dalan alang sa ilang kaugmaon.
Photo Courtesy: Philippine Entertainment Portal
