Gipadayag sa pinakabag-ong World Happiness Report nga suportado sa United Nations nga ang sobra nga paggamit sa social media nakaapekto sa kaayohan sa kabatan-onan sa daghang nasud.
Sumala sa report, adunay dako nga pagkunhod sa kalipay sa mga ubos 25-anyos sa United States, Canada, Australia, ug New Zealand, ilabi na sa mga batan-ong babaye.
Bisan pa niini, giingon sa report nga komplikado ang epekto sa social media—ang sobra nga paggamit nalambigit sa ubos nga wellbeing, apan ang mga wala usab mogamit niini mahimong mapalayo sa pipila ka positibong benepisyo.
Sa ranking sa 147 ka nasud, nagpabiling numero uno ang Finland sulod sa siyam ka sunod-sunod ka tuig isip labing malipayon nga nasud, samtang ang Afghanistan adunay pinaka-ubos nga lebel sa life satisfaction tungod sa kagubot ug isyu sa human rights.
Nagpadayon usab ang dominasyon sa Nordic countries sa top rankings, lakip ang Iceland, Denmark, Sweden, ug Norway.
Ang report nagbase sa unom ka sukdanan sa kalipay, lakip ang kita, kinabuhi nga gidugayon, social support, kagawasan sa pagpili, pagkamanggihatagon, ug pagsalig sa gobyerno.
Sumala sa mga eksperto, ang kalipay sa tawo mas naapektohan sa personal nga kinabuhi kaysa sa politika, ug ang mga butang sama sa kalinaw, kinaiyahan, ug pagsalig sa komunidad dako usab og papel sa overall wellbeing.
Photo Courtesy: Burlington Press
