Nakaseguro ang Department of Finance (DOF) og €200 milyon o kapin ₱13 bilyon nga pondo gikan sa KfW Development Bank sa Germany aron suportahan ang pagpanalipod ug pagpalambo sa marine resources sa nasud.
Ang kasabutan gipirmahan ni Finance Secretary Frederick Go ug KfW official Stephan Opitz sa usa ka ceremonial signing nga gipahigayon sa Manila niadtong Marso 17, 2026.
Gamiton ang pondo alang sa Marine Ecosystems for Blue Economy Development Program Subprogram 1 (MEBED1), nga nagtumong sa pagpalig-on sa regulasyon ug pagdumala sa pagpanalipod, rehabilitasyon, ug sustenableng paggamit sa marine ug coastal resources.
Sumala sa DOF, gilauman nga makatabang kini sa kapin tulo ka milyon ka Pilipino, lakip ang mga mangingisda, aquaculture operators, ug tourism workers, pinaagi sa paghatag og lig-on ug padayon nga panginabuhi samtang gipalig-on usab ang ekonomiya sa mga coastal communities.
Matod pa ni Go, ang pagpalambo sa blue economy makahatag og mas taas nga kita ug magpalig-on sa usa ka importante nga haligi sa pagtubo sa nasudnong ekonomiya.
Photo Courtesy: InsiderPh
