Daghan gihapon ang mga tawo, estudyante man o propesyunal nga likayan dayon ang Mathematics tungod sa kahadlok ug kalisod nga ilang gibati sa pag-atubang sa mga numero ug computation.
Sumala sa pagtuon sa University of Cambridge, kining kahimtang gitawag og Maths Anxiety, usa ka klase sa pag`kabalaka nga negatibong reaksyon sa subject nga matematika.
Matud pa sa mga eksperto, ang Maths Anxiety mahimong magsugod sa simpleng tensyon hangtod sa grabe nga kahadlok, ug dili lang kini makita sa classroom kundi bisan sa adlaw-adlaw nga sitwasyon diin gikinahanglan ang paggamit sa math.
Usa sa mga hinungdan niini mao ang pressure sa palibot sama sa kahadlok mahusgahan sa uban, ug ang mga negatibong kasinatian sama sa ubos nga grado, kaulaw sa klase, o kasaba gikan sa ginikanan.
Dugang pa, sumala sa National Numeracy, adunay cultural bias nga nagtuo nga ang ubang grupo o gender dili maayo sa math, nga makadugang sa kahadlok sa usa ka indibidwal.
Lakip sa mga timailhan sa Maths Anxiety ang pagkasinati og panic o stress, Kalibog ug lisod nga pag-focus sa pagkwenta, ug Kusog nga pagpitik sa kasingkasing.
Bisan pa niini, adunay mga paagi aron mabuntog ang kahadlok sa matematika. Girekomenda sa mga eksperto ang pag-ila sa kaugalingong emosyon, paghatag og panahon sa kaugalingon, ug pag-practice kanunay.
Importante usab ang pagpangayo og tabang sa uban ug pagbag-o sa panan-aw sa matematika, tungod kay ang kahibalo niini dili makuha dayon kundili pinaagi sa padayon nga pagkat-on ug paningkamot.
Photo Courtesy: Geman
