Patay nang napalgan ang usa ka tiggama og hollow block, nga tulo ka adlaw nang gi-report nga missing sa Barangay Kinabjangan, Nasipit, Agusan del Norte. Ang biktima nailhan lamang sa alyas Ricky, hingkod ang edad ug residente sa nahisgutang lugar.
Sa inisyal nga report, napalgan sa mga batan-ong namasol ang lawas sa biktima nga naglutaw-lutaw sa suba ug wala na’y kinabuhi.
Matod pa sa mga residente, kataposang nakita si Ricky niadtong adlaw nga Sabado nga impluwensyado sa ilimnong makahubog. Sukad niadtong panahona, wala na siya makita pa hangtod nga nakaplagan siya nga patay na.
Gikuha na sa mga otoridad ang patayng lawas sa biktima aron ipahigayon ang hustong proseso ug padayon usab ang imbestigasyon aron matino kung adunay foul play nga nahitabo sa iyang kamatayon.
