Gitakda sa House Committee on Justice ang petsa sa pagdungog sa mga reklamo sa impeachment batok kang Bise Presidente Sara Duterte. Kini human gideklarar sa House Justice panel nga “sufficient in grounds” ang 3rd ug 4th impeachment complaints.
Atol sa pagdungog, sa komitiba nga gipangulohan ni Batangas Representative Gerville Luistro, iyang gikompirmar nga ang duha ka mosyon naaprobahan nga walay pagsupak sa mga miyembro.
Ang inisyal nga pormal nga pagdungog alang sa impeachment complaints ni VP Sara gitakda sa Marso 25, Abril 14, 22 ug 29, 2026.
Sa sayo pa, gideklarar ni House Senior Deputy Majority Leader Lorenz Defensor sa Iloilo nga igo na ang ikatulong impeachment complaint sa basehanan sa pagpahigayon og hearing sa komite,
Busa si Luistro ug ubang mga sakop sa komite milihok sa pag-uyon kang Defensor ug sa walay pagsupak, ang 3rd ug 4th impeachment complaints giaprobahan nga igo na sa basehan.
Tungod niini, ang komitiba mopahigayon na og hearing proper diin ipresentar ang mga ebidensya ug mga testigo isip kabahin sa pagdeterminar sa probable cause.
Gitataw usab ni Luistro nga nadawat sa panel gikan sa plenaryo sa Balay ang awtoridad nga ipadayon ang ilang trabaho bisan kung nag-recess ang Kongreso gikan sa Marso 21 hangtod Mayo 3.
Ang pagtugot naglangkob sa pagpatuman sa mga paagi sa pagpanalipod alang sa nagreklamo ug mga testigo sama sa gipahayag sa Seksyon 8 sa Mga Lagda sa Pamaagi sa Impeachment Proceedings.
Nakadawat usab og suwat ang komite niadtong Marso 5 gikan ni Atty. Chel Diokno nga naghangyo sa pag-isyu og subpoena duces tecum alang sa mga lambigit nga dokumento.
Photo Courtesy: Philippine Newa Agency
