Naka-cater og 7,955 ka mga residente ang Philippine Statistics Authority (PSA) sa Iligan City ug sa probinsya sa Lanao del Norte atol sa operasyon sa National ID registration human sa pag-igo sa Bagyong Basyang, kini ang pahayag atol sa interview sa Juander Radyo News team kang Juan Paulo Angelo Lozano, Registration Officer II ug National ID Focal Person, ang kalihokan gitumong ilabi na sa mga panimalay nga nabasa o nawala ang ilang mga ID tungod sa bagyo.
Padayon gihapon ang National ID registration operations sa nagkadaiyang lungsod sa probinsya lakip na sa Kauswagan, Maigo, Sapad, Sultan Naga Dimaporo, Salvador, Tubod, Lala, ug Kapatagan. Aduna usab registration center sa Baroy nga abli matag Miyerkules aron mas daghang residente ang maka-avail sa serbisyo.
Samtang, isip kabahin sa selebrasyon sa Civil Registration Month, nakapahigayon usab ang PSA og serbisyo caravan aron mas mapadali ang paghatag og serbisyo sa komunidad.
Sa miaging semana, nagpatuman usab ang team og house-to-house registration pinaagi sa purok system sa Barangay Tibanga, ilabi na alang sa mga senior citizen ug persons with disabilities (PWD) nga naglisod sa pag-adto sa registration sites.
Gipasabot ni Lozano nga libre ang pagparehistro sa National ID hangtod sa pag-release niini, lakip na ang paper format ug digital copy alang sa mga residente nga nagpuyo sa layo nga lugar.
Gidugang pa niya nga andam ang buhatan sa PSA sa pagdawat sa tanang gustong magparehistro sa National ID aron mas daghang Pilipino ang makabenepisyo sa nasudnong identification system.
