Giaprubahan na sa House of Representatives sa ikatulo ug katapusang pagbasa ang House Bill No. 8418, usa ka balaodnon nga naghatag og gahum kang Presidente Ferdinand “Bongbong” Marcos Jr. sa pag-usab sa excise tax sa petrolyo. Ubos niini nga lakang, mahimong suspensihon o pakunhoran ang buhis og hangtod sa ₱10 matag litro sa gasolina ug ₱6 sa diesel kon ang presyo sa krudo sa kalibutan moabot og $80 matag bariles o kon adunay nasudnon nga kalamidad. Ang gahum mahimong gamiton sa Presidente hangtod sa katapusan sa tuig 2028 aron daling maibanan ang palas-anon sa publiko batok sa nagmahal nga pamahe ug palitonon.
Bisan pa man sa 247 ka boto nga pabor, duna gihapoy mga magbabalaod nga nagduhaduha ug nipaabot sa ilang mga reserbasyon. Si Rep. Chel Diokno sa Akbayan Party-list, bisan og niboto og pabor, nipahimangno nga kinahanglan ang hugot nga pagbantay sa paghatag og emergency powers sa Presidente ug gipasiugda nga dili igo ang pagkunhod sa buhis kon walay dinaliang ayuda sa mga labing apektadong sektor. Nanawagan usab ang iyang grupo og dugang suporta sama sa libreng sakay sa tren ug mas lapad nga fuel subsidy alang sa mga delivery riders ug tricycle drivers.
Sa laing bahin, hugot nga nisupak si Kabataan PL Rep. Renee Co ug uban pang progresibong representante tungod sa pagtuo nga dili kini ang tinuod nga solusyon sa krisis sa lana. Matod ni Co, ang Oil Deregulation Law ang babag aron masiguro nga ang diskwento sa buhis mapahimuslan sa mga konsumidor imbes nga mabulsa lang sa mga dagkong kompanya sa lana.
Giduso sa mga supak ang mas permanenteng solusyon, sama sa hingpit nga pagtangtang sa VAT sa petrolyo ug ang pagpalig-on sa regulasyon sa industriya sa lana aron mapanalipdan ang katawhan sa taas nga presyo.
