Taliwala sa pamahayag sa pamunuan sa Lumbia Airbase nga walay angay kabalak-an sa pag-abot sa mga Tropang Amerikano sa syudad, nakapukaw na hinuon kini og daghang mga pangutana labi na sa pipila ka miyembro sa Cagayan de Oro City Council.
Kagahapong adlawa, atol sa regular nga sesyon, gipasabot ni Konsehal Edgar Cabanlas nga kung itandi sa ubang mga EDCA sites sa Pilipinas, lahi ang Lumbia Airbase tungod nahimutang kini tunga sa komersyo ug kabalayan. Resulta sa dili kapugngan nga kabalaka sa mga residente nga duol sa airbase.
Alang sa Konsehal nga ang mga airbase o military camp labi na ang iya sa US o adunay relasyon sa US, magnet kana sa bisan unsang kagubot o giyera, sama nalang sa nahitabo sa Middle East kung asa ang mga nasud nga adunay base military sa US, nahimong target sa retaliation kon pagbalos sa nasud Iran.
Tungod niini, gisugyot ni Cabanlas, nga giuyonan sab sa iyang mga kaubanan nga imbetahan ang mga opisyal sa Lumbia Airbase, kasundaluhan ug kapulisan aron nga matubag ang daghan nilang mga panguta ug aron na sab nga makatabang nga mahupay ang kabalaka sa mga residente sa syudad.
Kahibaloang karong bulan sa sa Abril hangtod na sa bulan sa Mayo, ilunsad ang Balikatan Exercises nga salmutan sa mga tropang pinoy, US ug gikan sa nasud Japan nga nagtumong lamang og humanitarian assistance ug disaster preparedness activities.
Photo courtesy: CdeO City Council/ Facebook
