Mokabat sa Php340,000 balor sa gituohang shabu ang nasakmit sa kapulisan sa Tagum City Police Station human sa gipatumang search warrant operation sa hiniusang puwersa, kauban ang SWAT 1st Davao del Norte Provincial Mobile Force Company ug Regional Drug Enforcement Unit tanan sakop sa Davao Norte Police Provincial Office, kaniadtong nilabay nga adlaw.
Ang suspek giilang si alyas Ryan, 39-anyos usa ka Top Priority Illegal Drug Personality.
Sa pagpatuman sa maong search warrant nga gipagawas sa Regional Trial Court Branch 30, naaresto ang suspek sa iyang panimalay sa Barangay La Filipina, sa nasangpit nga dakbayan.
Nasakmit sa kapulisan ang usa ka knot-tied transparent plastic cellophane nga adunay sulod nga gi-tuohang shabu, usa ka itom nga sling bag, ug usa ka improvised glass tube tooter nga adunay residue sa gi-tuohang shabu. Gibanabana nga mokabat sa kapin kon kulang 50 gramos ang narekober sa kapulisan atol sa maong operasyon.
Sa pagkakaron, anaa sa kustodiya sa Tagum City Police Station ang maong suspetsado, kinsa mag-atubang sa kasong paglapas sa Section 11, Article II sa Republic Act 9165 kon Comprehensive Dangerous Drugs Act of 2002.
Photo Courtesy : TCPS DavNor
