Gipalig-on ang kahandam sa pagresponde sa mga kalamidad sa Davao Region human gidonar sa Latter-day Saints Charities Southeast Asia Incorporated ang mga kagamitan alang sa humanitarian assistance ug disaster response ngadto sa 11th Regional Community Defense Group (11RCDG) sa Philippine Army. Ang seremonyal nga pagtugyan gipahigayon niadtong Oktubre 21, 2026, sa Camp San Gabriel, Mintal, Davao City, diin mitambong isip guest of honor si Major General Alvin Luzon, commander sa 10th Infantry (Agila) Division.
Gilauman nga makatabang ang mga donasyong kagamitan sa paghatag og emerhensiyang tabang ug sa pagresponde sa mga komunidad nga maapektuhan sa linog, baha, landslide ug uban pang kalamidad. Pinaagi sa panaghiusa sa militar ug mga organisasyong humanitarian, tumong nga mapalig-on ang koordinasyon ug masiguro ang mas paspas nga paghatag og tabang sa mga nanginahanglan.
Padayon usab nga misuporta ang 10th Infantry Division sa mga komunidad nga naapektuhan sa mga kalamidad, lakip ang mga paningkamot sa rehabilitasyon sa Glan ug Malapatan sa Sarangani Province pinaagi sa pagtukod og temporaryong kapuy-an ubos sa programang “Bangon Glan.” Gipasiugda ni Maj. Gen. Luzon ang hustong paggamit, pag-atiman ug pagmentinar sa mga donasyong kagamitan aron masiguro nga magamit kini sa umaabot nga mga emerhensiya.
Photo Courtesy: 10ID
