Nagpahayag og kabalaka ang pipila ka mga senador ug nagduso sa mas hugot nga anti-bullying policies sa mga eskwelahan atol sa hearing sa Senate Committee on Basic Education tungod sa padayon nga mga kaso sa bullying nga nag-apekto sa mga estudyante sa nasud.
Sumala kang Senador Bam Aquino, chairperson sa komite, dakong kabalaka na kini sa mga ginikanan ug komunidad. Gikutlo niya ang datos sa Second Congressional Commission on Education nga nagpakita nga ang Pilipinas giila pa gani nga “bullying capital of the world,” diin 50 porsyento sa Grade 5 students naka-experience og bullying kada bulan.
Gisuportahan usab ni Senador Erwin Tulfo ang pagrepaso ug pagpalapad sa Republic Act No. 10627 o Anti-Bullying Act of 2013, tungod kay posible nga dili na igo ang kasamtangang mga lakang aron mapugngan ang padayon nga bullying incidents.
Samtang, gisugyot ni Senador Raffy Tulfo ang mas hugot nga implementasyon sa anti-bullying policies, lakip ang pagbutang og CCTV cameras sa classrooms, counseling ug psychological support sa mga biktima, training sa teachers ug parents, ug pagpalig-on sa Good Manners and Right Conduct lessons.
Gipadayag usab sa hearing nga kulang gihapon ang guidance counselors sa mga public schools, nga nakapahinay sa pag-imbestiga ug pagresolba sa mga kaso sa bullying.
Sa pahayag sa Department of Education, mahimo nang magsugod ang mga magtutudlo og fact-finding ug i-report ang bullying incidents sa school head bisan wala pa’y pormal nga reklamo gikan sa estudyante.
Photo Courtesy: PNA
