Usa ka empleyado sa Guangdong China ang nakadani sa atensyon sa social media human makadaog og talagsaong premyo sa ilang company party 365 ka adlaw nga fully paid vacation leave o usa ka tuig nga bakasyon nga adunay sweldo.
Ang maong istorya nagsugod diin giingong nahitabo ang raffle sa annual company dinner niadtong Abril 9, 2023, human sa tulo ka tuig nga walay selebrasyon tungod sa pandemya sa COVID-19.
Sa maong raffle, imbis kwarta o gadgets ang ipremyo, nakahukom ang kompanya nga maghatag og usa ka tuig nga bakasyon nga adunay sweldo isip grand prize aron pasalamatan ang mga empleyado sa ilang sakripisyo sa panahon sa pandemya.
Ang empleyado nga nakadaog, nga nagtrabaho sa kompanya sulod na sa 14 ka tuig, miingon nga mao kadto ang unang higayon nga nakadaog siya og grand prize sa raffle sa ilang kompanya.
Human niini, daghang netizen ang nagreact sa social media ug nagkomento og “sana all,” samtang ang uban nag-ingon nga maayong ideya usab kini nga buhaton sa mga kompanya sa ubang nasud isip paagi sa pagpasalamat sa ilang mga empleyado.
Photo Courtesy: Vectorstock
