Nanawagan si Surigao del Norte Board Member Kaiser Recabo Jr. sa Maritime Industry Authority o MARINA nga imbestigahan ug posible usab nga manubag ang Cokaliong Shipping Lines tungod sa nagpadayon nga reklamo sa serbisyo sa biyahe tali sa Cebu ug Surigao.
Sumala BM Recabo, daghang pasahero ang nagreklamo sa kahimtang sa biyahe, hinungdan nga iyang gihangyo ang Department of Transportation o DOTr nga mangilabot aron masulbad ang problema sa ruta nga Cebu–Surigao–Cebu.
Giawhag usab sa opisyal ang DOTr nga tan-awon ang posibilidad nga pulihan ang Cokaliong og laing shipping line nga mahimong moserbisyo sa maong rota, aron masiguro ang mas maayong serbisyo ug kaharuhay sa mga pasahero nga kanunay mobiyahe tali sa duha ka lugar.
Matod pa ni Recabo, importante nga masiguro sa gobyerno nga ang mga shipping company nga nag-operate sa rehiyon nagtuman sa hustong standard sa kaluwasan ug kalidad sa serbisyo alang sa publiko.
