Gi-apil ang Pilipinas sa listahan sa mga nasud nga giimbestigahan sa Office of the United States Trade Representative (USTR) tungod sa giingong kakulang sa pagpugong sa mga produktong gihimo gamit ang “forced labor.”
Sumala sa USTR, susihon kung ang kakulang sa pagpatuman sa balaod batok sa forced labor nakahatag ba og dili patas nga bentaha sa gasto sa ubang nasud kumpara sa mga kompanya ug trabahante sa United States.
Ang imbestigasyon gihimo ubos sa Trade Act of 1974 Section 301, nga nagtugot sa U.S. nga magpahamtang og taripa o ubang trade restrictions kung mapamatud-an ang dili patas nga trade practices.
Sumala kang Jamieson Greer, USTR ambassador, susihon kung ang mga polisiya sa 60 ka nasud makadaot ba o makababag sa negosyo sa U.S.
Apil usab sa listahan ang ubang nasud sa ASEAN sama sa Singapore, Malaysia, Indonesia, Vietnam, Thailand, ug Cambodia.
Apan bisan ang pipila ka nasud nga adunay lig-on nga proteksyon sa mga trabahante sama sa European Union, Japan, Canada ug Australia naapil gihapon sa imbestigasyon aron masusi kung adunay mga produktong gihimo sa forced labor nga mosulod sa ilang merkado.
Nangayo na usab og opisyal nga pakighinabi ang U.S. sa 60 ka nasud nga naapil sa imbestigasyon aron hisgutan ang isyu sa forced labor.
Photo Courtesy: Resource Center-Source intelligence
