Nagpagawas og dinalian nga pasidaan ang Embahada sa Amerika sa Pilipinas sa nakalabay nga adlaw, ngadto sa ilang mga lungsuranon nga mag-amping batok sa mga posibleng protesta taliwala sa kagubot sa Middle East.
Giawhag sa embahada ang tanang American nationals nga magpabiling alerto ug maglikay sa mga dapit diin duna’y dagkong pundok sa mga tawo, ilabi na sa palibot sa ilang buhatan sa Manila.
Gipahinumduman usab ang mga Amerikano nga ang pag-apil sa mga demonstrasyon isip langyaw mahimong isipon nga kalapasan sa ilang immigration status.
Alang sa seguridad, giawhag sila sa pag-enroll sa Smart Traveler Enrollment Program o STEP aron dali nga makadawat og mga alerto ug mapangita sa mga otoridad kon duna’y motumaw nga emerhensya sa nasud.
